บทปรมราชินีนาถาภิถุติปสิทธิวรทานคาถา บทเจริญพระพุทธมนต์ถวายพระพรสมเด็จพระพันปีหลวง

ปรมราชินีนาถา,        สิริกิตฺติ  มหายสา,

ปุญฺญาธิการสมฺปนฺนา,        ทยฺยานํ  สิริวฑฺฒกา,

ธมฺมิกา  ธิติสมฺปนฺนา,        สพฺพทา  ทีฆทสฺสินี,

สมฺพุทฺธสาสเนเยว,        ติพฺพสทฺธา  ปสาทิกา,

สมฺพุทฺธมามกา  อคฺคา,        ภิยฺโย  ตํ  อุปถมฺภติ,

ทุกฺขปฺปตฺเต  จ  นิทฺทุกฺเข,        ภยปฺปตฺเต  จ  นิพฺภเย,

สพฺพทยฺเยปิ  กาเรติ,        มหาการุญฺญเจตสา,

เมตฺโตทเกน  โตเสติ,        ฆมฺเม  เทโวว  เมทนึ,

ยตฺถ  อจฺโจทกํ  โหติ,        ตํ  กาเรติ  สโมทกํ,

ยตฺถ  อปฺโปทกํ  โหติ,        ตํ  กาเรติ  ปโหนกํ,

ยํ  ยํ  ภชติ  ภูมินฺทา,        ตํ  ตํ  สุขํ  ปกุพฺพเต,

เย  อุปายา  กตา  โหนฺติ,        ภาสิตา  จาปิ  จินฺติตา,

สพฺเพ  เต  รฏฺฐวาสีนํ,        สุขตฺถาย  ปวตฺตเร,

สมฺมาอาชีวเมเตสํ,        วิเนติ  อุปถมฺภติ,

ภิยฺโย  ผาสุวิหาราย,        ธนาคมํนุพฺรูหิตุํ,

สิปฺปอาชีวเวมชฺฌํ,        กาเรติ  อนุกมฺปกา,

ตสฺมา  สมฺภาวิตา  โหติ,        ปชาย  มาตุฐานิยา,

สพฺพทยฺยา  อิมาคมฺม,        สนฺติมคฺคานุสาสกํ,

เอกจิตฺตา  สมคฺคา  จ,        รฏฺฐํ  วฑฺเฒนฺติ  สพฺพโส,

รฏฺฐสฺส  เอกรชฺชญฺจ,        ธมฺมนุญฺญญฺจ  รกฺขเร,

ปรมราชินีทานิ,        สตฺตาสีติสมายุกา,

อีทิเส  มงฺคเล  กาเล,        เทมสฺสา  วรมงฺคลํ,

รตนตฺตยานุภาเวน,        รตนตฺตยเตชสา,

ปรมราชินี  เสฏฺฐา,        ทยฺยิกานํ  มหาคุณา,

ทีฆายุกา  อโรคา  จ,        นิทฺทุกฺขี  อกุโตภยา,

วณฺณูเปตา  พลูเปตา,        สุขิตา  โหตุ  สพฺพทา,

อนฺตรายูปสคฺคา  จ,        วินสฺสนฺตุ  จุปทฺทวา,

จินฺติตา  สพฺพจินฺตาปิ,        ปริปูเรตุ  สพฺพโส,

จิรํ  รชฺเช  ปติฺฏฺฐาตุ,        ปติฏฺฐา  ทยฺยวาสินํ,

เต  ปุตฺตธีตุนตฺตาโร,        ญาติสาโลหิตา  จิเม,

ทยฺยิกา  จ  มหามจฺจา,        สุขิตา  โหนฺตุ  สพฺพทา,

ทยฺยชาติ  วิโรเจตุ,        สพฺพสมฺปตฺติสิทฺธิยา,

อิทฺธึ  ปปฺโปตุ  เวปุลฺลํ,        วิรุฬฺหึ  จุตฺตรึ  สทา,

จิรํ  โลเก  ปติฏฺฐาตุ,        สมฺมาสมฺพุทฺธสาสนนฺติ .