บทอาฏานาฏิยปริตร

วิปสฺสิสฺส  นมตฺถุ,        จกฺขุมนฺตสฺส  สิรีมโต,

สิขิสฺสปิ  นมตฺถุ,        สพฺพภูตานุกมฺปิโน,

เวสฺสภุสฺส  นมตฺถุ,        นฺหาตกสฺส  ตปสฺสิโน,

นมตฺถุ  กกุสนฺธสฺส,        มารเสนปฺปมทฺทิโน,

โกนาคมนสฺส  นมตฺถุ,        พฺราหฺมณสฺส  วุสีมโต,

กสฺสปสฺส  นมตฺถุ,        วิปฺปมุตฺตสฺส  สพฺพธิ,

องฺคีรสสฺส  นมตฺถุ,        สกฺยปุตฺตสฺส  สิรีมโต,

โย  อิมํ  ธมฺมมเทเสสิ,        สพฺพทุกฺขาปนูทนํ,

เย  จาปิ  นิพฺพุตา  โลเก,        ยถาภูตํ  วิปสฺสิสุํ,

เต  ชนา  อปิสุณา,        มหนฺตา  วีตสารทา,

หิตํ  เทวมนุสฺสานํ,        ยํ  นมสฺสนฺติ  โคตมํ,

วิชฺชาจรณสมฺปนฺนํ,        มหนฺตํ  วีตสารทํ .

(วิชฺชาจรณสมฺปนฺนํ,        พุทฺธํ  วนฺทาม  โคตมนฺติ . )

นโม  สพฺพพุทฺธานํ,        อุปฺปนฺนานํ  มเหสินํ,

ตณฺหงฺกโร  มหาวีโร,        เมธงฺกโร  มหายโส,

สรณงฺกโร  โลกหิโต,        ทีปงฺกโร  ชุตินฺธโร,

โกณฺฑญฺโญ  ชนปาโมกฺโข,        มงฺคโล  ปุริสาสโภ,

สุมโน  สุมโน  ธีโร,        เรวโต  รติวฑฺฒโน,

โสภิโต  คุณสมฺปนฺโน,        อโนมทสฺสี  ชนุตฺตโม,

ปทุโม  โลกปชฺโชโต,        นารโท  วรสารถี,

ปทุมุตฺตโร  สตฺตสาโร,        สุเมโธ  อปฺปฏิปุคฺคโล,

สุชาโต  สพฺพโลกคฺโค,        ปิยทสฺสี  นราสโภ,

อตฺถทสฺสี  การุณิโก,,        ธมฺมทสฺสี  ตโมนุโท,

สิทฺธตฺโถ  อสโม  โลเก,        ติสฺโส  จ  วทตํ  วโร,

ปุสฺโส  จ  วรโท  พุทฺโธ,         วิปสฺสี  จ  อนูปโม,

สิขี  สพฺพหิโต  สตฺถา,        เวสฺสภู  สุขทายโก,

กกุสนฺโธ  สตฺถวาโห,        โกนาคมโน  รณญฺชโห,

กสฺสโป  สิริสมฺปนฺโน,        โคตโม  สกฺยปุงฺคโว .

นตฺถิ  เม  สรณํ  อญฺญํ,        พุทฺโธ  เม  สรณํ  วรํ,

เอตเน  สจฺจวชฺเชน,        โหตุ  เต  ชยมงฺคลํ,

นตฺถิ  เม  สรณํ  อญฺญํ,        ธมฺโม  เม  สรณํ  วรํ,

เอตเน  สจฺจวชฺเชน,        โหตุ  เต  ชยมงฺคลํ,

นตฺถิ  เม  สรณํ  อญฺญํ,        สงฺโฆ  เม  สรณํ  วรํ,

เอตเน  สจฺจวชฺเชน,        โหตุ  เต  ชยมงฺคลํ .

ยงฺกิญฺจิ  รตนํ  โลเก,        วิชฺชติ  วิวิธํ  ปุถุ,

รตนํ  พุทฺธสมํ  นตฺถิ,        ตสฺมา  โสตฺถึ  ภวนฺตุ  เต ,

ยงฺกิญฺจิ  รตนํ  โลเก,        วิชฺชติ  วิวิธํ  ปุถุ,

รตนํ  ธมฺมสมํ  นตฺถิ,        ตสฺมา  โสตฺถี  ภวนฺตุ  เต ,

ยงฺกิญฺจิ  รตนํ  โลเก,        วิชฺชติ  วิวิธํ  ปุถุ,

รตนํ  สงฺฆสมํ  นตฺถิ,        ตสฺมา  โสตฺถี  ภวนฺตุ  เต .

สกฺกตฺวา  พุทฺธรตนํ,        โอสถํ  อุตฺตมํ  วรํ,

หิตํ  เทวมนุสฺสานํ,        พุทฺธเตเชน  โสตฺถินา,

นสฺสนฺตุปทฺทวา  สพฺเพ,        ทุกฺขา  วูปสเมนฺตุ  เต .

สกฺกตฺวา  ธมฺมรตนํ,        โอสถํ  อุตฺตมํ  วรํ,

ปริฬาหูปสมนํ,        ธมฺมเตเชน  โสตฺถินา,

นสฺสนฺตุปทฺทวา  สพฺเพ,        ภยา  วูปสเมนฺตุ  เต .

สกฺกตฺวา  สงฺฆรตนํ,        โอสถํ  อุตฺตมํ  วรํ,

อาหุเนยฺยํ  ปาหุเนยฺยํ,        สงฺฆเตเชน  โสตฺถินา,

นสฺสนฺตุปทฺทวา  สพฺเพ,        โรคา  วูปสเมนฺตุ  เต .